Ushtria ukrainase sot ka njoftuar se vetëm një javë pasi që presidenti rus Vladimir Putin shpalli aneksimin e rajonit të Khersonit në Ukrainë, kanë arritur të çlirojnë 400 kilometra katrorë në këtë rajon.
“Forcat e armatosura të Ukrainës kanë çliruar mbi 400 kilometra katrorë në rajonin e Khersonit, që nga fillimi i tetorit. Rusët janë tërhequr nga territori, sipërfaqja e të cilës është ekuivalente me 75 mijë fusha të futbollit”, tha sot zëdhënësja e ushtrisë ukrainase Natalia Gumeniuk.
Në anën tjetër, presidenti ukrainas Volodymyr Zelensky ka theksuar se kanë arritur të çlirojnë mbi 10 qytete, që deri më dje ishin nën kontrollin e forcave ruse.
Ndryshe mobilizimi rus nuk është duke shkuar sipas planit të Vladimir Putinit, pasi shumica prej tyre nuk po i përgjigjen thirrjeve apo po vendosin të largohen nga vendi.
E edhe ata pak që po vendosin të nisen në luftë, po ankohen për mungesë të pajisjeve elementare. Shumë prej tyre kanë pushkë të ndryshkura, pa përvojë ushtarake, ushqim e medikamente.
Shumë video amatore shfaqin rezervistët e pakënaqur, të cilët po ankohen se nuk po paguhen dhe nuk janë të regjistruar e as që kanë kontratë me shtetin rus.
