Sot në kazermën “Alekso Damnievski Bauman” në Veles është mbajtur ceremoni solemne për avancimin e 120 nënoficerëve dhe betimi solemn i 150 ushtarëve profesionistë. Në ceremoni morën pjesë dhe folën ministrja e mbrojtjes Sllavjanka Petrovska dhe zëvendësshefi i Shtabit të Përgjithshëm, gjeneralmajor Azim Nuredin.
Pjesëtarët e Armatës nga radhët e ushtarëve profesionistë, të cilët tashmë kanë kaluar tre muaj trajnim për nënoficerë në Komandën për Trajnime dhe Doktrina sot janë graduar në gradën e parë të nënoficerit dhe ushtarët e rinj profesionistë kanë dhënë betimin e tyre.
Ministrja Sllavjanka Petrovska u tha nënoficerëve të rinj se kushdo që i bashkohet profesionit ushtarak ka një mision unik, t’i shërbejë atdheut dhe popullit të tij sepse profesioni ushtarak paraqet një sakrificë të madhe por edhe nderin më të lartë, ndërsa veshja e uniformës së një shteti anëtar të NATO-s ka një përgjegjësi shtesë.
„Faleminderit dhe urime të gjithëve, që na bëtë krenarë si komb dhe si institucion dhe që jeni inkurajimi dhe frymëzimi ynë për të vazhduar përballimin e sfidave të kohës që jetojmë dhe arkitekturës së re të sigurisë. Është e vërtetë se çdo gjeneratë ka luftën e vet, por është gjithashtu e vërtetë se vitet e fundit janë ndoshta koha e sfidave më të mëdha me të cilat është përballur bota në shtatëdhjetë vitet e fundit”, tha Petrovska dhe tha se mësimi dhe përsosja personale nuk duhet të ndërpritet kurrë.
Ministrja theksoi se ndërtimi i qëndrueshmërisë si një nga konceptet kyçe të Aleancës së NATO-s duhet të fillojë gjithmonë me një shembull personal, duke shtuar se gatishmëria për të reaguar shpejt, me efikasitet dhe vendosmëri ndaj çdo situate tregon në fakt gatishmërinë tonë për të mbrojtur vlerat që ndajmë dhe të mbrojtur shtetin dhe qytetarët.
„Prandaj, përkundër të gjitha sfidave me të cilat po përballet shoqëria jonë, si ministre gjithmonë bëj përpjekje shtesë për të përmirësuar Armatën në tërësi, por sigurisht edhe cilësinë e jetës së çdo individi në të. Në një periudhë relativisht të shkurtër kohore kemi mundësuar dyfishimin e buxhetit të mbrojtjes, prokurimin e pajisjeve dhe armatimeve moderne, rindërtimin dhe rivitalizimin e objekteve dhe infrastrukturës me interes strategjik dhe mbi të gjitha thelluam lidhjet me aleatët, shkëmbimin e përvojave dhe organizimin e stërvitjeve të përbashkëta”, nënvizoi Petrovska.
Zëvendësshefi i Shtabit të Përgjithshëm, gjeneralmajor Azim Nuredin, duke u uruar zhvillim të suksesshëm profesional nënoficerëve të rinj dhe ushtarëve profesionistë të saporekrutuar, u tha atyre që të kryejnë detyrat dhe obligimet në mënyrë të përkryer në të ardhmen, të përfaqësojnë denjësisht Armatën dhe shtetin.
Në ceremoni iu ndanë mirënjohje tre nënoficerëve më të mirë, rreshter Dimçe Vakadinski, rreshter Filip Angjelovski, rreshter Aleksandar Trajkoviq.
Me rastin e paraqitjes së nënoficerëve të rinj dhe betimit solemn të ushtarëve profesionistë, në ceremoni morën pjesë shefi i Shtabit të Komandës Operative, gjeneral brigade Mirçe Gjorgoski, përfaqësues nga kabineti i presidentit, komandantët e njësive të Armatës, përfaqësues nga Komanda për Trajnime dhe Doktrina, të afërm dhe miq të ushtarëve profesionistë dhe nënoficerëve të sapo prodhuar.
