22 C
Struga
Saturday, August 13, 2022
spot_img

Presidenti Ilir Meta dekoron profesorët e Universitetit Ndërkombëtar të Strugës, prof.dr.Bashkim Rama dhe prof.dr.Marko Bello

Presidenti i Republikës së Shqipërisë, Ilir Meta, ka dekoruar pas vdekjes me titullin “Për Merita të veçanta civile”, dy profesorët e Universitetit Ndërkombëtar të Strugës prof.dr.Bashkim Rama dhe prof.dr.Marko Bello.

Ambasadorin Marko Bello (pas vdekjes): “Për merita të veçanta në fushën e diplomacisë, politikës, mësimdhënies, gazetarisë, dhe për kontributin e spikatur në procesin e integrimit evropian, duke dëshmuar një përgjegjshmëri të lartë në kryerjen e çdo detyre shtetërore e shoqërore. Bashkëthemelues i Këshillit të Ambasadorëve shqiptarë, me formim dhe diapazon të gjerë kulturor, intelektual aktiv dhe personalitet i shquar dhe i moderuar në çdo fushë të jetës politike e shoqërore.”;

si dhe Ambasadorin Bashkim Rama (pas vdekjes): “Për merita dhe kontribut të spikatur në fushën e diplomacisë dhe mësimdhënies, duke dëshmuar një përgjegjshmëri të lartë në kryerjen e çdo detyre shtetërore e shoqërore. Bashkëthemelues i Këshillit të Ambasadorëve Shqiptarë, me formim e diapazon të gjerë kulturor, intelektual aktiv dhe personalitet i shquar dhe i moderuar në çdo fushë të jetës politike e shoqërore.”;

Në fjalën e tij përshëndetëse, Kreu i Shtetit u shpreh:

“Jemi mbledhur për të nderuar dy kolegë, miq dhe zyrtarë të lartë të shtetit tonë, Ambasadorët Marko Bello dhe Bashkim Rama. 

Zoti Marko Bello ka qenë një intelektual mjaft aktiv në shumë fusha. Me një formim dhe diapazon të gjerë kulturor, një personalitet i moderuar në fushën e politikës dhe mjaft bashkëpunues, gjithmonë për interesat kombëtare. 

Ai ishte gjithashtu një diplomat me përvojë dhe kompetencë, por njëkohësisht edhe një mësimdhënës me eksperiencë e dije të thella.

Zoti Bello mbante gradën ‘Doktor i Shkencave Juridike dhe Marrëdhënieve Ndërkombëtare’ nga Fakulteti i Drejtësisë të Krajovës, Rumani.

Me zotin Marko kemi bashkëpunuar gjithashtu, kur ai ka qenë deputet për tri legjislatura në Kuvendin e Shqipërisë, ku është shquar për integritetin e lartë, tolerancën dhe konstruktivitetin, po njëkohësisht edhe si ministër për Integrimin Europian dhe ministër Shteti.

Zoti Bello ka qenë Ambasador i Shqipërisë në Rumani dhe njëkohësisht ka shërbyer edhe si Zëvendësministër i Mbrojtjes. 

Ai ishte një ndër anëtarët themelues të Këshillit të Ambasadorëve Shqiptarë. 

Kujtojmë me shumë nderim dhe vlerësojmë zotin Bashkim Rama, për kontributin e tij të spikatur në fushën e diplomacisë dhe të mësimdhënies, ku është dalluar gjithmonë, për shkak të aktivizimit të tij mjaft publik dhe përgjegjshmërisë në kryerjen e detyrave.

Bashkim Rama ka pasur një karrierë të suksesshme në diplomacinë shqiptare, por njëkohësisht edhe si profesor në disa universitete brenda dhe jashtë vendit. 

Zoti Rama ka punuar si drejtor i Akademisë Diplomatike, si ekspert në Ministrinë e Punëve të Jashtme, si Sekretar i Parë i Ambasadës sonë në Gjermani, Kryetar i Delegacionit të Shqipërisë në UNESCO, Ambasador i Shqipërisë në Bullgari, në Kosovë dhe në Maqedoninë e Veriut.

Ai ka qenë një njohës shumë i mirë i çështjeve rajonale dhe një analist në media, si dhe profesor i marrëdhënieve ndërkombëtare, gjeopolitikës dhe diplomacisë, si dhe praktikës diplomatike në disa universitete.

Bashkim Rama ka qenë edhe rektor i Universitetit Ndërkombëtar të Strugës dhe gjithashtu anëtar i Këshillit të Ambasadorëve shqiptarë. 

Duke falënderuar Këshillin e Ambasadorëve Shqiptarë, për punën dhe përkushtimin gjatë këtyre viteve, në mënyrë të veçantë do t’i falënderoja për propozimin e tyre, për të nderuar zotin Marko Bello dhe zotin Bashkim Rama me Titullin: ‘Për Merita të Veçanta Civile’, për kontributin e tyre të spikatur në fushën e diplomacisë, të politikës, të mësimdhënies, duke dëshmuar një përgjegjshmëri të lartë në kryerjen e çdo detyre shtetërore e shoqërore.

Përherë mirënjohës për kontributin e dhënë prej tyre që politika e jashtme e Shqipërisë të jetë e qëndrueshme dhe e besueshme, në shërbim të integritetit europian dhe mbrojtjes të interesave kombëtare.

I përjetshëm qoftë kujtimi tyre!”.

Related Articles

Na Ndiqni

0FansLike
0FollowersFollow
- Advertisement -spot_img

Latest Articles