Një Kuran, i shkruar mjeshtërisht me dorë më shumë se 200 vjet më parë nga një imam indonezian i cili ishte dëbuar në skajin jugor të Afrikës nga kolonizatorët holandezë, është krenaria e myslimanëve të Cape Town që e ruajnë me xhelozi në një xhami në lagjen historike të qytetit Bo Kaap. Kurani u gjet nga ndërtuesit në një qese letre në papafingo të Xhamisë Auwal, gjatë punës për rinovimin e saj në mesin e viteve 1980. Studiuesit besojnë se Imam Abdullah ibn Kadi Abdus Salaam, i njohur si Tuan Guru, e shkroi Kuranin bazuar te kujtesa e tij pasi u dërgua në Cape Town si i burgosur politik, nga ishulli Tidore në Indonezi në vitin 1780, si ndëshkim për bashkimin me lëvizjen e rezistencës kundër kolonizatorëve holandezë.
“Ishte jashtëzakonisht pluhur, dukej sikur askush nuk kishte qenë në atë papafingo për më shumë se 100 vjet”, tha Cassiem Abdullah, një anëtar i komitetit të xhamisë.
Kurani i palidhur, i përbërë nga faqe të lira që ishin të panumërta, ishte në gjendje çuditërisht të mirë. Boja e zezë dhe e kuqe e përdorur për shkrimin kaligrafik qartësisht të lexueshëm në alfabetin arab ishte ende në gjendje shumë të mirë. Sfida e madhe për komunitetin lokal mysliman në përpjekjen e tyre për të ruajtur një nga artefaktet më të vlefshme në trashëgiminë e tyre të pasur, e cila daton që nga viti 1694, ishte të sigurohej që të gjitha faqet që përmbajnë më shumë se 6000 vargjet e Kuranit të vendosen në sekuencën e duhur. Këtë detyrë e mori përsipër Maulana Taha Karaan, e cila ishte kryejuriste e Këshillit Gjyqësor Mysliman me bazë në Cape Town, në bashkëpunim me disa studiues vendas të Kuranit. I gjithë procesi, i cili përfundoi me lidhjen e faqeve, zgjati tre vjet për t’u përfunduar.
Advertisements
Që atëherë, Kurani është ekspozuar në Xhaminë Auwal, e cila u themelua nga Tuan Guru në 1794 si xhamia e parë në atë që tani është Afrika e Jugut. Tre përpjekje të pasuksesshme për të vjedhur tekstin e çmuar e detyruan komitetin ta fiksonte atë në një këllëf rezistent ndaj zjarrit dhe plumbave në pjesën e përparme të xhamisë. (BBC)
