Советникот на Стејт департментот Дерек Шоле, кој утрово пристигна во Скопје, во Владата беше пречекан и оствари средба со премиерот Димитар Ковачевски и дел од министрите.
– Нашето силно стратешко партнерство со САД е од голема важност во годината која ни претстои, а која е исполнета со предизвици и кај нас, но и глобално. За овие предизвици, но и за многу други теми ќе разговараме на денешните средби, посочи премиерот Ковачевски на својот Фејсбук-профил пред средбата со Шоле.
![](https://ci5.googleusercontent.com/proxy/DM0M9cty9cxX627BEj1oe6jPsUBUZWterUKd-QGPfys1bif1yxfoKT__HcpwrAa1-fI9xTRzqXDtES0T6-4zD8Mvc4aVGx4FIpIbA3fG0F9COOAqr2I0YWdH_9FMi3M=s0-d-e1-ft#https://mia.mk/wp-content/uploads/2023/01/Ковачевски-Шоле1.jpg)
Министерот за надворешни работи, Бујар Османи на својот Фејсбук-профил во врска со средбата во Владата со Шоле напиша дека проектите и активностите во рамки на Стратешкиот дијалог се солидна основа за понатамошно јакнење на стратешкото партнерство и унапредување на билатералните врски.
– Благодарност за поддршката за нашето претседавање со #ОБСЕ2023 и САД – Јадранската Повелба во услови на актуелните безбедносни предизвици. Европската перспектива и присуството на САД во регионот како значаен влог во стабилноста и просперитетот на Западен Балкан. Како НАТО сојузници остануваме обединети во поддршката за Украина и одбраната на споделените демократски вредности, напиша Османи.
![](https://ci5.googleusercontent.com/proxy/SycE4JXylv-asvoMh3GnPIcz-rQ_i8wTcbKVWuESPBtaPW9OfhaDS6rOaofQdlxrNWAEcN6Vf6Rj6Ey7qfTJ-lnMuJFL6-gKGuyQ2pYoVjR2xWFsGwt8evVwqJa1JQ=s0-d-e1-ft#https://mia.mk/wp-content/uploads/2023/01/Ковачевски-Шоле.jpg)
Воедно, премиерот Ковачевски на советникот на Стејт департментот Шоле му подарил дрес од македонската репрезентација со неговото име.
Неговата посета на земјава е во рамки на балканската турнеја, за време на која ќе ги посети и Косово и Србија.
![](https://ci6.googleusercontent.com/proxy/x5EcA7c73Nr8PYMvxjt-KhfIZLNuZS_h8AlpMxzEsHt28LbHdI6hfoN87akkcXlkJdtWUFvMkmjA-NX32uj8MpW4O4h4snEzkyUIqfSBrfaFpmnexiBQfoQTc6h5m8M=s0-d-e1-ft#https://mia.mk/wp-content/uploads/2023/01/Ковачевски-Шоле2.jpg)
Советникот на државниот секретар на САД Ентони Блинкен, од Скопје заминува за Приштина на средби со владини претставници, политички лидери и претставници на граѓанското општество. Во фокусот на разговорите ќе бидат напорите на САД да помогнат во унапредувањето на косовската и евроатлантската интеграција, вклучително и преку дијалогот олеснет од ЕУ за да се постигне сеопфатен договор за нормализација на односите меѓу Косово и Србија, фокусирани на меѓусебното признавање.
Шоле, утре ќе продолжи во Белград, каде со раководството на српската Влада ќе разговара за енергетската безбедност, регионалната економска интеграција и напредокот кон целта на Србија за пристап во ЕУ. Тој, исто така, ќе разговара за улогата на Србија во зајакнувањето на регионалниот мир и безбедност и нејзиниот континуиран ангажман во Дијалогот олеснет од ЕУ за нормализирање на односите со Косово.