Се преземаат сите мерки за да се идентификуваат напаѓачите, уверува шефот на дипломатијата Бујар Османи, откако навивач на бугарскиот клуб Левски заврши во Ургентниот центар прободен со нож. Бугарскиот државјанин сега е во добра здравствена состојба. Според министерот навивачите живеат во посебен свет и случувањата меѓу навивачките групи не треба да се стават во политички контекст, а секој што тоа ќе го стори и ќе сака да придобие политички поени, како што истакна Османи, нема добри намери за билатералните односи меѓу Скопје и Софија.
„Затоа воопшто нема да се обидам да направам корелација помеѓу тоа што се случи помеѓу навивачите на Левски и Шкупи и односот помеѓу Република Северна Македонија и Република Бугарија или пак било кои други односи“, рече Османи.
Османи верува дека етничката припадност не била мотив за нападот и повтори дека МНР го осуди насилството. Осуда претходно пристигна и од бугарското МНР.
„Жалиме што позитивниот и спортски дух на натпреварот помеѓу ФК „Левски“ и ФК „Шкупи“ беше нарушен со акти на агресија надвор од фудбалскиот терен. Очекуваме надлежните органи во Република Северна Македонија да ги преземат неопходните активности за ефикасна истрага и спроведување на правдата во врска со сериозниот инцидент. Уште еднаш ја нагласуваме клучната важност од преземање ефективни мерки за спречување на вакви акти на агресија и гарантирање на безбедноста на сите граѓани“, наведуваат од бугарското МНР.
Настанот го искоментира и бугарскиот премиер Николај Денков, според кого спортот треба да обединува, а агресијата е целосно неприфатлива.
