Најмалку 73 се убиени и 52 повредени во 136 напади врз здравствени установи во Украина од почетокот на инвазијата, изјави на брифинг со новинарите Стефан Дујарик, портпарол на генералниот секретар на ОН, Антонио Гутереш.
Дујарик рече дека ги наведува најновите бројки од Светската здравствена организација, агенција на ОН одговорна за меѓународното јавно здравје.
Тој додаде дека нападите врз здравствените установи во Украина во моментов сочинуваат повеќе од 68 отсто од сите напади врз здравствените установи ширум светот од почетокот на годината.
Дополнително, повеќе од едно од четири лица во Украина се раселени поради војната, вклучително и околу 4,9 милиони бегалци и 7,1 милион луѓе внатрешно раселени во Украина, рече Дујарик.
ОН сега има повеќе од 1.300 вработени на теренот во Украина, кои работат во осум оперативни центри низ целата земја, рече портпаролот. Дујарик додаде дека генералниот секретар Гутереш и понатаму е „длабоко загрижен“ за тековните напади во Украина, кои резултираат со цивилни жртви и оштетување на инфраструктурата.
