Министерството за внатрешни работи преку претставници од секторите за внатрешни работи и Македонскиот полициски синдикат денеска продолжи со активностите од кампањата „МВР за граѓаните – заедница, доверба, одговорност“ во општините Ѓорче Петров, Куманово, Дебар, Ресен, Гостивар, Велес, Гевгелија и Берово.
Примарна цел на кампањата е доближување до граѓаните на суштината, вредностите и карактеристиките на концептот – полициско работење со заедницата. Важноста на градењето партнерство помеѓу полицијата и граѓаните, како и механизмите за контрола врз полицијата што придонесуваат за зголемување на нејзиниот кредибилитет и интегритет беа дел од темите на кои граѓаните имаа можност низ непосредни средби да поразговараат со полициските службеници во скопската општина Ѓорче Петров, Куманово, Дебар, Ресен, Гостивар, Велес, Гевгелија и Берово.
Како што информираат од МВР, полициските службеници во разговорите со жителите на овие градови, ја потенцираа улогата на полицијата во државата и во заедницата како институција задолжена за безбедноста на граѓаните и општеството. Самите граѓани низ разговорите истакнуваа дека тие најдобро ги знаат предизвиците со кои се соочуваат во заедницата во која живеат и се свесни дека полицијата секогаш е првиот пријател во неволја.
-Покрај гарантирање на редот, мирот, безбедноста и владеењето на законите, полицијата работи на сузбивање на криминалот и води бескомпромисна борба со сите криминогени појави во општеството, па акцентот на средбите беше ставен и на превентивните мерки за зголемување на сигурноста на граѓаните, како и на почитувањето на основните права и слободи за граѓаните и обезбедувањето граѓански услуги. Главната порака на кампањата која се случуваше последните четири викенди и која и денес ја потврдија заедно граѓаните и полициските службеници е дека полициското работење во заедницата значи градење на партнерство кое се базира на доверба меѓу полицијата и граѓаните, а планската соработка придонесува за спречување на криминалот со краен резултат зголемена безбедност и подобар квалитет на живеење, велат од МВР.
Досегашните реформи и вложување во полицијата од актуелното раководство, додаваат, се наградени со висока доверба од страна на граѓаните, значително зголемена во последниве неколку години, а според нивните оценки полицијата стана една од трите најтранспарентни институции во државата. Така, активната транспарентност на МВР од просечни 59,5 отсто во 2016 година, во 2022 година достигна високи 91,7 отсто, што претставува скок за 32,2 отстоо, поминувајќи три нивоа, од крајно затворена институција до многу добра активна транспарентност.
Кампањата „МВР за граѓаните – заедница, доверба, одговорност“ започна пред три седмици во осум градови на Секторите за внатрешни работи и за четири викенди беше во поголемиот дел од градовите на нашата држава.
