Германскиот канцелар Олаф Шолц ја истакна подготвеноста на НАТО да го спречи ширењето на војната што ја започна Русија против Украина, а во исто време побара од рускиот претседател да се повлече од Украина.
„Путин не треба да ја потценува подготвеноста на НАТО да ги брани сите свои членки. Ова е точно без исклучок за партнерите на НАТО на Балтикот, Полска, Романија, Бугарија и Словачка“, рече Шолц во телевизиското обраќање, истакнувајќи дека Западот ќе ги распореди сите расположливи ресурси да се осигура дека конфликтот во Украина не се проширува во другите европски земји.
Тој рече дека Германија и нејзините сојузници „знаат како да се бранат“.
Шолц рече дека со рускиот напад врз Украина во Европа започна војна каква што континентот не доживеал во последните 75 години. Тој јасно стави до знаење дека Путин е виновен за војната, а не рускиот народ.
„Путин е единствениот виновник за оваа војна, а не рускиот народ“, рече германскиот канцелар во говорот под знамињата на Германија, Европската унија и Украина.
Шолц побара од рускиот претседател веднаш да ги повлече своите војници од Украина. Тој исто така нагласи дека санкциите што ЕУ и Германија ги подготвуваат за Русија тешко ќе ја погодат руската економија.
„Путин нема да победи“, рече Шолц. Тој го обвини рускиот претседател дека сака да го врати светот во минатото.
„Нема враќање во 19 век кога големите сили одлучуваа за судбината на помалите народи. Нема враќање во Студената војна кога суперсилите го поделија светот“, рече Шолц.
Шолц во недела ќе се обрати пред Бундестагот на вонредна седница свикана по повод рускиот напад врз Украина, објави Вол Стрит Џурнал.
