Не можејќи да се одобрат во редовна постапка, Владата одлучи законите со кои според неа се намалуваат трошоците за изградба на Коридорите 8 и 10-Д, да се предложат со европско знаме. Законот за работни односи, Законот за градење, Законот за урбанистичко планирање, Законот за експропријација и посебниот закон за автопатишта ќе бидат доставени до Собранието, а Законот за шуми и за земјоделско земјиште се повлекуваат од постапка.
„Владата на денешната седница изгласа 5 предлог закони кои ќе бидат доставени до Собранието. Со оглед на тоа што ЕУ го стави и Коридорот 8 на картата на коридори, заедно со Коридорите 10 и 10-Д, а за овие закони се расправа подолго време во Собранието, Владата и медиумите, одлучивме дека петте закони ќе се предлагаат со европско знаме“, рече Груби.
Запрашан дали има кадри кои имаат капацитет да ги надгледуваат работите на ваков проект, директорот на ЈП „Државни патишта“ вели дека ќе бидат ангажирани нови кадри.
„Имавме и јавен конкурс и сега се врши евалуација за прием на 28 инженери, архитекти, градежни инженери, електроинженери и специјалисти за животна средина како специјален тим за следење на работите во двата коридори“, рече Ејуп Рустеми, директор на ЈП „Државни патишта“.
Владата тврди дека договорот со Бехтел и Енка е потпишан врз основа на важечките законски одредби. Но, според нив, за да се спречи поскапувањето на проектот, предложени се законски измени кои не ги бара градежната компанија, туку градежната стратегија на земјава. Во меѓувреме, Јавното обвинителство соопшти дека го прифатило договорот постигнат меѓу ЈПДП и конзорциумот Бехтел и Енка и истиот ќе биде предмет на испитување за можни криминални и коруптивни елементи.
