Фокусирани сме на решавање на енергетската ситуација, како и на социјалниот дијалог, преку којшто ја покачивме минималната плата на 18.000 денари, а сега работиме и на планираното зголемување на пензиите, порача премиерот Димитар Ковачевски на денешната средба во Скопје со д-р Валтер Дефа, специјален советник за економски политики на премиерот, номиниран од Канцеларијата на германскиот канцелар, на која беше присутна и амбасадорката на Германија во земјава, Анке Холштајн.
На состанокот, информираат од владината прес-служба, е посочена големата и искрена поддршка од Германија на евроинтеграциските и на развојните процеси на нашата држава, коишто продолжуваат со цел напредок на Северна Македонија. Споделен е впечатокот дека Владата има поставено цели и знае што сака да постигне на економски план и во таа насока се разменети мислења околу унапредувањето на имплементацијата на проектите.
![](https://ci4.googleusercontent.com/proxy/Dsscdc97-vYf_9ie7Pe9mpDsJCsSpOkeNXe8xUkQKkSRhsluGgI4vWsTvkbiAJ0i7jnb_fOfOHAUn2B41cFFSZ4yTsSBBlTeui1HcmAPTcCeIjQD_OR3niOkr_Rn6-jV6gB2VI-7pSM3FZOfoldSfoQw7gp3r6g4V3lTXiPDoOFEkX4wruqg-w=s0-d-e1-ft#https://mia.mk/wp-content/uploads/2022/02/21022022_PVRSM_Kovacevski_sredba-so-specijalniot-sovetnik-Defa_1-scaled.jpg)
Премиерот Ковачевски се заблагодари за големото пријателство со Германија, кое што го оцени како значајно, како на полето на интеграциите, така и во областа на економијата.
– За нас како Влада е од клучно значење унапредување на животниот стандард на граѓаните. Развојот на економија се постигнува преку инвестициите и иновациите и исто така продолжуваме со структурните реформи и со посветеноста кон нивна ефикасна имплементација, рече премиерот Ковачевски.
На средбата на премиерот Ковачевски и германскиот советник Дефа е договорена интензивна комуникација и средби на коишто ќе се разгледуваат мерливи резултати од предвидените динамични активности.