Советот на ОН за човекови права (УНХРЦ) оваа недела ќе одржи специјална седница за Украина, на покана од Киев, на која ќе се разговара за ситуацијата во земјата и за извештаите за масовни жртви во Мариупол.
На состанокот во четврток, тие би можеле да донесат резолуција со која ќе се бара од новоформираната Истражна Комисија за војната во Украина да поднесе детален извештај до Советот оваа година.
Дипломатите кои ја поддржуваат Украина рекоа дека покажувањето солидарност е важно токму сега кога Русија би можела да ги засили своите напади додека го одбележува Денот на победата на поранешниот Советски Сојуз над нацистичка Германија во Втората светска војна.
„Сегашната ситуација бара итна седница на Советот, имајќи ги предвид неодамнешните извештаи за воени злосторства и прекршувања во градот Буча и другите ослободени области, како и извештаите за масовни жртви во градот Мариупол“, изјави украинската амбасадорка Јевхенија Филипенко.
Портпаролот на руската мисија во Женева не бил веднаш достапен за коментар. Русија негира дека напаѓа цивилни цели и нејзините дејствија во Украина ги нарекува „специјална операција“ за разоружување на Украина и заштита на граѓаните од фашизмот.
Украина и западните земји ги отфрлаат обвинувањата на Русија за фашизам како неосновани и тврдат дека Русија извршила неиспровоцирана агресија.
Русија беше исфрлена од Советот за човекови права минатиот месец. Теоретски, Русија сè уште може да испрати свој пратеник на седницата во Женева и ќе ѝ биде дозволено да одговара на прашањата, според прописите на Советот.
