Обилниот снег предизвика несреќи и големи прекини на електричната енергија во Словачка, Чешка и Полска, каде што денеска загинаа најмалку две лица поради временските неприлики.
Во Цисиец, на југот на Полска, во близина на границата со Словачка, една постара жена загинала откако дрво паднало за време на невремето и тешко го оштетило нејзиниот дом. Пожарникарите ја пронашле пензионерката во куќата, изјавил портпаролот на противпожарната служба за новинската агенција ПАП.
Една жена, исто така, загинала во близина на северното пристаниште Гдањск кога нејзиниот автомобил удрил во дрво, според ТВН24, кој објави повеќе од 140 сообраќајни несреќи поврзани со обилни снежни врнежи и лизгави патишта.
Во северна Словачка, властите прогласија „вонредна состојба“ во 27 општини, што овозможува посебни вонредни мерки и ограничувања, објави новинската агенција ТАСР.
Неколку популарни скијачки центри се затворени за викендот.
Жителите на регионалниот главен град Жилина и околните градови се повикани да не ги напуштаат своите домови освен ако е апсолутно неопходно.
Во Чешка, дрвјата што паднале на далноводи оставиле десетици илјади домаќинства без струја, објави новинската агенција ЧТК.
Во близина на Јаблоне над Орличи, кон полската граница, службите за итна помош морале да извлечат две повредени лица од нивниот автомобил откако дрво паднало врз него.
