Tentoi vetëvarjen në burg, vdes xhaxhai i Arjela Muratit, studentes që u vra nga i dashuri

0

Ka ndërruar jetë në Spitalin e Traumës 38-vjeçari Bujar Murati, i cili tentoi vetëvrasjen në qelinë e tij të burgut në 13 Mars 2019-s në Berat.

Një prej të burgosurve në IEPV-në e Beratit ka gjetur vdekjen në Spitalin e Traumës në Tiranë, në orët e para të mëngjesit të sotëm. 38-vjeçari Bujar Murati, nga fshati Lybeshë në Poliçan, tentoi vetëvrasjen në qelinë e tij në 13 Mars 2019.

38-vjeçari që vuante prej disa muajsh dënimin në IEPV-në e Beratit për “mashtrim” u gjet i varur në qelinë e tij nga gardianët e turnit dhe u dërgua menjëherë në Spitalin Rajonal të Beratit.

Mjekët e këtij Spitali konfirmuan atë mbrëmje se,38-vjeçari Bujar Murati kishte pësuar “vdekje klinike” dhe kishte mbërritur në spital në gjendje “kome”.

Për këtë arsye, mjekët e Repartit të Urgjencës së Spitalit të Beratit, e kishin dërguar me ambulancë në Spitalin e Traumës në Tiranë, për një trajtim më të specializuar. Por duket se,38-vjeçari Murati, me gjithë trajtimet e marra për rreth 2-javë,nuk ka mundur dot ti shpëtojë vdekjes.

Ai ka vdekur në orët e para të mëngjesit të sotëm dhe është përcjellë nga familjarët për në banesën e fundit, në fshatin ku u lind dhe u rrit, në fshatin Lybeshë.

Të kontaktuar nga mediat burimet e burgut të Beratit nuk kanë dashur të japin asnjë informacion në lidhje me ngjarjen e rëndë që ndodhi në 13 Mars, në lidhje me shkaqet dhe dinamikën e saj.

Ajo që u arrit të mësohej nga burime konfidenciale ditën e vetëvrajes, ishte fakti se 38-vjeçari Bujar Murati ishte dënuar për “mashtrim” dhe ishte xhaxhai i Ariela Muratit, studentes që u vra nga i dashuri i saj pranë fakulteti të Mjekësisë në Tiranë rreth 1 vit më parë.

Ende edhe sot nuk dihet shkaqet e vërteta të kësaj ngjarjeje të rëndë që ndodhi brenda ambienteve të IEPV-së Berat dhe që u mbajt e fshehtë nga institucioni i Burgut të Beratit.

Në lidhje me ngjarjen reagoi më herët edhe dega e PD-së Berat, duke e cilësuar fshehjen e kësaj vetëvarjeje “të porositur” nga lart.